Mga Gamit Sa Aking Mesa

Bawat gamit sa aking mesa ay may sinisimbolo sa aking buhay… And hopefully, makita at maunawaan mo ang kahulugan ng bawat isa.

Ang aking mga kagamitan

Ang aking mga kagamitan

 

Una, ang aking laptop… Dito ko nagagawa ang lahat ng dapat gawin. 🙂 Ang pagsusulat. Ang pagdidisenyo ng mga civil engineering plans. Ang pakikinig ng mga musika. Ang panunood ng mga pelikula. At marami pang iba. Dahil dito, nababawasan ng kaunti ang kalat sa aking mesa dahil naka-compressed ang lahat ng files sa memorya ng aking laptop. Parang utak ng tao na pinagiimbakan ng lahat ng masasaya at malulungkot na karanasan.Kung hindi ito isisik-sik sa utak, marahil napakaraming magkakagulo lalo ang buhay. Mabuting ito’y naisasantabi hangga’t hindi kailangan.

Pangalawa, ang aking mga libro… Sa bawat buklat ko nito, alam kong may madadagdag sa aking kaalaman. At ang karagdagang kaalaman ay nakakabuti para sa aking kinabukasan. Parang buhay ng tao, na habang lumalayo ka ng pahina ay malayo na rin ang nararating ng iyong katauhan. Bawat araw ay may natututunan ka.

Pangatlo, ang aking larawan… Ito ang representasyon ko ng aking sarili. Nakikita ko ang aking mga ngiti sa mga pagkakataong ako’y nalulungkot na sa aking buhay. Ito yung nagpapaalala sa akin na meron akong magandang ngiti para maibsan ang aking kalungkutan.

Pang-apat, ang aking cellphone… Halos lahat ng tao ay nagsasabing hindi nila alam kung paano sila mabubuhay ng wala nito. Pero ako, kaya kong manatiling buhay ng wala nito kasi hindi naman ito ang nagbibigay ng hangin sa paligid para ako’y makahinga. Nagiging importante lang ang cellphone ko kapag kailangan kong gumising ng maaga. Hindi natin dapat ibase sa materyal na bagay ang ating buhay dahil darating ang panahon na ito’y maglalaho.

Pang-lima, ang aking salamin sa mata… Dahil sa kasipagan kong magbasa at mag-aral nanlabo ang aking mga paningin kaya kinailangan ko nito para luminaw ang aking tingin. Sa buhay natin, marami ang malabo kaya kailangan natin ng isang bagay na magpapalinaw ng lahat. Hindi ito simpleng salamin dahil ito ang nagbibigay sa akin ng kakayahan na makaintindi sa kabila ng mga malalabo kong karanasan.

Pang-anim, ang aking mga panyo… Hindi naman ako burara para hindi ilagay sa tamang lagayan ang mga ito. Ngunit, may mga pagkakataon talaga sa buhay ko na bigla na lang akong naiiyak tuwing nakakabasa ako ng mga istoryang nakakakurot sa aking puso. Tulad ng panyo na nagpupunas sa aking mga luha, nandiyan din si Lord na yumayakap sa akin sa tuwing ako’y nasasaktan.

Pang-pito, ang remote ng TV… Kasabay ng hilig kong magbasa ay mahilig din akong manood ng telebisyon. Marami akong nakikitang bagong bagay at marami akong nalalaman sa kalagayan ng mundo. Nagsisilbi itong visual representation sa mga bagay na nababasa ko. Sa buhay, hindi sapat ang nalaman mo o nadinig mo, lagi tayong umaasa at naghahanap ng katibayan na makikita ng ating dalawang mata.

Pang-walo, ang aking tubig… Ito ang pinakaimportanteng kalat sa aking mesa. Ito ang nagpapawi ng aking uhaw at pagkatuyo’t sa araw-araw na pag-upo ko sa harap ng mesa. Kailangan ko ito dahil ito ang minsang nagiging dahilan para maging malinis ang mesa ko, lalo na kapag nasasanggi ko ito. Parang tubig na naglilinis ng mga bagay ang pagdadasal ko sa Diyos tuwing ako’t napupuno na ng kumplikasyon sa buhay.

 

❝ Dahil nakita mo na puno ng mga gamit ko ang aking mesa na sumisimbolo sa buhay ko… alam mo na ngayon na wala ka ng puwang sa buhay ko. ❞

Kasukat ng Iyong Puso

Masarap mamuhay sa mundong nakukuha mo ang lahat ng iyong gusto.  Ngunit hindi nito napupunan ang mga kakulangan sa buhay natin.  Maaaring marami ka ng sinubukan para sa iyong kasiyahan, at ito’y naging panandalian lamang.  Hindi pera o sariling kakayahan ang makakapuno sa hinihinging atensyon ng ating puso.  At kailanman hindi magtutugma ang sukat ng parihabang pera sa sukat ng puso natin.  Anuman ang isiksik mo sa bagay na hindi kasukat ay masasayang lamang.

Photo Credit: aaron.com

Photo Credit: aaron.com

Kaya’t huwag na tayong maghanap pa sapagkat Siya na ang nakahanap sa atin upang punan ang puso nating nagkukulang.  Tanging ang Diyos lamang ang makakaunawa at makakaayos sa puso nating nasira na ng bawat nagdaang pagsubok.

 
 


//